உப்புமா எனும் விடுமுறை

கூகிளில் சுட்டது

ராஜபக்சேவின் சட்டையை

உங்கள் அறையில் பத்திரமாய் இருந்தபடியே

உலுக்கிவிட்ட ஒரு இற்றைக்கும்

சமந்தா வின் புன்னகைக்கு

ஒரு லைக் தட்டலுக்கும் இடையே

தட்டிவிடுகிறீர்கள் உங்கள் மனைவியின்

உப்புமா குறித்தொரு பகடியை

பரம்பரை பகையை போல் 

கடத்தி வருகிறீர்கள் 

உப்புமா மீதான வெறுப்பையும் 

அதை செய்யும் அவள் மீதான

அக்கறையின்மையையும்

இட்லி,கோதுமை என அத்தனை மாவும்
கையிருப்பு தீர்ந்தபின்
நிராயுதாபாணியாய்-அவள்
உப்புமாவை சரணடைந்திருக்கக்கூடும்

ஒரு பயணத்தின் தொடக்கத்திலோ
அல்லது அது தந்த அலுப்பிலோ
மனமோ,உடலோ களைத்தவேளையிலோ
அது சமைக்கபட்டிருக்கலாம்

வகைகொன்றாய்உங்களுக்கும்
உங்கள்பிள்ளைகளின் சிற்றுண்டிக்கும்
குறிப்பேடுகள் தொகுக்கும் அவள்
துணைப்பொருள் தேடும் தலைவலிக்கு
ஒருநாள் ஓய்வளிக்க நினைத்திருக்கலாம்

வாரம்தோறும் வரும் ஞாயிறுகள் அல்ல
அவள் சமையலறைக்கு வாய்த்ததெல்லாம்
இந்த உப்புமா தினங்களின்
ஓரிரு மணித்துளிகள் தான்

வாழ்நாள் எல்லாம் உங்களை சகிப்பவளுக்காக
எப்போதேனும் உப்புமாகளை சகித்துக்கொள்ளுங்கள்
இல்லையேல் முயன்று தோற்ற
உங்கள் நண்பர்களிடம் கேட்டுத் தெரிந்துகொள்ளுங்கள்
உப்புமா செய்யவும் தான் எத்தனை பொறுமைவேண்டும் என்று !


(ஒரு நாளும் என் உப்புமாவை வெறுக்காத கஸ்தூரிக்கு நன்றி)