வீதியில் சந்தித்த பயணச்சித்தர் !!

                சில நாட்களுக்கு முன் தொடர்பதிவு ஒன்றை தொடங்கி இருந்தேன். பயணம் பற்றிய அந்த பதிவுச் சங்கிலியில் கோர்க்கப்பட்ட வெங்கட் நாகராஜ் அண்ணா, தான் நீண்ட விடுப்பில் செல்லபோவதால் வெளியிடுகிறேன் என உடனே பயணங்கள் முடிவதில்லை பதிவை வெளியிட்டார். பயணம் நன்கு அமைய வாழ்த்துக்கள் என வாழ்த்துச் சொன்ன போது நான் துளியும் நினைத்துப் பார்க்கவில்லை இந்த பயணத்தில் அவரை சந்திப்பேன் என்று!! புதுகை கணினித் தமிழ் சங்கத்தில் தான் முதன் முதலில் வலைசித்தரை சந்தித்தேன். நிலவன் அண்ணா புத்தக வெளியீட்டு விழாவில் புகைபடச்சித்தரின் தரிசனம் கிடைத்தது. இன்று இருபத்திமூன்றாம் வீதி கூட்டத்தில் நம் பயணச்சித்தர் வெங்கட் நாகராஜ் அண்ணாவை பார்க்க முடிந்தது அத்தனை சந்தோசம்.

அண்ணாவின் fruit சாலட் போல இந்த வீதியில் நிறைய பேரை பார்க்கமுடிந்தது. நம்ம புதுகை வலைபதிவு குடும்பம் தவிர்த்து நான் சந்தித்த புதிய நபர்களை தான் நான் குறிப்பிடுகிறேன். கவிஞர் நிலா பாரதி, கிருஷ்ண வரதராஜன் இவங்க ரெண்டு பேருமே புதுகையை சேர்ந்தவர்கள் என்றாலும் எனக்கு இத்தனை அத்தனை பரிட்சயம் இல்லாதவர்கள். அனு வரதராஜன் வந்திருப்பார்கள் என எதிர்பார்த்தேன். வரவில்லை. தமிழ் இளங்கோ அய்யா வந்திருந்தார். ஓகே இப்போ ஓவர் to வெங்கட் அண்ணா.

வெங்கட் நாகராஜ் அண்ணாவோடு கஸ்தூரியும், நானும், மகி குட்டியும்.

    

கூட்ட அரங்கத்துக்குள் நுழைந்து, இருக்கையில் அமர்ந்த பின் நம்மை அடையாளம் தெரியுமா என்ற ஐயமும், சரி கஸ்தூரியோடு உள்ளே நுழைந்தோம், அதனால் அடையாளம் கண்டுகொள்வார் என்ற நம்பிக்கையோடும் வணக்கம் வைத்தேன். வெங்கட் அண்ணா அத்தனை உற்சாக புன்னகையோடு வணக்கம் வைத்தார்.  கூட்டத்தின் ஒவ்வொரு நிகழ்வுகளையும் கூர்ந்து கவனித்துக்கொண்டிருந்தார். சிறப்புரை ஆற்ற தொடங்கிய போது அரங்கமே ஒரு விசயத்தை ஒரே மனதாக கூறிய கருத்து. உங்க கூட பயணம் செய்தது போல இருந்தது என்பதுதான் அது. நானும் வழிமொழிந்தேன். உங்கள் பதிவுகளை போலவே உங்க பேச்சும் ஒரு நிறைவான பயண உணர்வை தந்தது என்றேன்.  நிகழ்ச்சி முடிந்த பின் சில மணித்துளிகள் அண்ணாவோடு பேசிகொண்டிருந்தேன். பேச்சு தமிழ் வலை உலகை முழுவதுமாக சுற்றி வந்தது. எனக்கு ஆச்சர்யமான விஷயம் என்வென்றால் இதுவரை யாரிடம் பேசினாலும் எஸ்.ரா ஒரு புத்தகத்தில் என்றோ, சுஜாதா என்றோ, வண்ணதாசன் என்றோ மேற்கோள் சொல்லி பேசக் கேட்டிருக்கிறேன். வெங்கட் அண்ணா வலை உலக நண்பர்களின் பதிவுகளில் இருந்து  அத்தனை நுணுக்கமாக மேற்கோள் காட்டி பேசினார். ஒன்பது மணி முதல் ஒன்பது மணிவரை வேலை என்கிறார். எப்படித்தான் இப்படி துடிப்பாய் வலைத்தளத்தில் இயங்குகிறாரோ!!! 

பொதுவாக வெங்கட் அண்ணாவின் பதிவுகளை தொடர்ந்து வசிப்பவர்கள் அதில் இடம்பெறும் புகைப்படங்களுக்கு விசிறியாகிவிடுவார்கள். ஆனால் அப்படியான அருமையான புகைப்படங்களை எடுக்க அவர் எடுத்துக்கொண்ட முயற்சிகள், அதிலும் முக்கியமாக பழங்குடி பெண்களை புகைப்படம் எடுக்கும் வேளையில் ஏற்படும், சந்திக்கும் பிரச்சனைகளை மிக நகைசுவையாக எடுத்துக்கூறினார். ஷங்கர் பட மேகிங் பார்த்தது போல இருந்தது. பயணத்தை பற்றி ரசித்து ரசித்து பேசினார். ஆலங்குடி நீலா அக்கா அவர்களது உணவு அங்காடியில் இருந்து வாழைப்பூ வடையும், வரகரிசி பாசயமும் தருவித்திருந்தார்கள். நிகழ்வின் சுவையை அது மேலும் கூட்டியதெனலாம். கவி வைகறை அண்ணாவும், தென்றல் கீதா அக்காவும் மிக அருமையாக நிகழ்வை ஏற்பாடு செய்திருந்தனர். நிலவன் அண்ணா வலைபதிவர் கையேடு அடங்கிய தோள்பையை அன்பளித்தார். நிகழ்வு இனிதே நிறைவடைந்தது. இனி வெங்கட் அண்ணாவின் பதிவுகளை படிக்கையில் உற்சாகமான அந்த வெள்ளை புன்னகை நினைவு வந்துகொண்டே இருக்கும்.

டிஸ்கி; சொல்ல மறந்துட்டேன். இது என் இருநூற்றி ஒன்றாவது பதிவு.