பெப்ஸி - உங்கள் குளிர்பானம் எங்கள் நெருப்பை அணைக்காது!

                                               உலகமயமாக்கல்,  நுகர்வோர் கலாச்சாரம் போன்ற வார்த்தைகளை தெரிந்துகொண்ட நாளில் இருந்து விளம்பரங்களின் அழகியலை மீறி அதன் அரசியலையும் புரிந்துகொள்ளும் தெளிவு கைவரப்பெற்றிருக்கிறது. ஆனாலும் என்ன, குற்றம் பார்க்கின் சுற்றம் இல்லை என்ற சிந்தனையோடு, பிரபு போல புரட்சி, போராட்டம் என்று இறங்காமல், நாலு பேருக்கு நல்லதுன்னா எதுவும் தப்பில்லை (எந்த நாலு பேர்?!) என கமல் (போல) கமர்ஷியல்களையும் சகிக்கப் பழகியாயிற்று.

                                                     ஆனாலும் சமயங்களில் போகிறபோக்கில் நாம் கட்டிவைத்திருக்கிற மனக்கோட்டைகளை மண்கோட்டைகள் என தகர்த்தெறியும், நம் விழுமியங்களை கேலிசெய்யும் சில விளம்பரங்கள் அவை  நுகர்வோருக்காக  தயாரிக்கபடுபவை அல்ல, அவை முதலாளிகளின் மனத்திருப்திக்காக தயாரிக்கபடுபவை என ஒப்பனை மீறி நிஜ முகம் காட்டி விடுகின்றன. சமீபத்திய பெப்சி விளம்பரம் பார்த்தீர்களா? பார்க்கவிட்டால் பார்த்துவிட்டு தொடர்ந்து படியுங்கள்.

 

பெரியவர்கள், அறிவுஜீவிகள், பிழைக்கத் தெரிந்தவர்கள் எல்லாம் மௌனம் சாதிக்கும் எத்தனையோ பிரச்சனைகளில், இளம்கன்று பயமறியாது என இடர்களையும், இன்னல்களையும் துச்சமாக மதித்து களம் காணும் கல்லூரி மாணவர்களின் போராட்டங்கள் நேற்றும் இன்றும் ஈழம் தொடங்கி மதுஎதிர்ப்பு வரை  நாம் கண்கூடாக பார்த்துக்கொண்டுதான் இருக்கிறோம். அவர்களை கேலி செய்வதுபோல் கல்லூரி நிர்வாகத்திற்கு எதிராக பட்டினி போராட்டத்தை முன்னெடுக்கும் மாணவர் படையில் ஒரு இளைஞர் பெப்ஸியை கண்டதும் மண்டி விடுவதாகவும், பெப்ஸி அதான் குடிச்சேன் என விளக்கம் கூறுவதுமாக இந்த விளம்பரம்  மிக கேவலமாக இருக்கிறது. அய்யா பெப்ஸி விளம்பர தயாரிப்புக் குழுவினரே குடுக்கிற காசுக்கு கூடுதலா கூவுங்க. அது உங்க பிழைப்பு. அதற்காக நாளைய இந்தியா என நாளும் நாங்கள் பார்த்துப்பார்த்து பூரித்து வளர்த்தெடுக்கும் மாணவர்களை கொச்சை படுத்தாதீர்கள். அநீதிக்கு எதிராக குரல் கொடுக்கும், போராடுகிற ஒவ்வொரு மாணவனுக்கும் பாடத்திட்டத்துக்குள் மாட்டிக்கொண்டு, தேர்வுத்தாள் திருத்திக்கொண்டு, பதிவேடுகள் பராமரித்துக்கொண்டு, கிடைக்கிற சந்தர்ப்பத்தில் எல்லாம் இப்படியான அக்கினி துண்டங்களை ஆங்கோரு காட்டிலோர் பொந்திடை வைத்துக்கொண்டிருக்கும் எங்கள் நெருப்பை உங்கள் குளிர்பானங்கள் கொண்டு அணைத்துவிடலாம் என  நினைக்காதீர்கள். இந்த நினைப்பு உங்க பிழைப்பை கெடுத்து விடக்கூடும். கல்லாபெட்டிகள் ஜாக்கிரதை!