நானும் ரௌடி (நடிகை) தான்- நயன் தாரா

                       கடும் மழை தயவால் நான்கு நாள் தீபாவளி விடுமுறை கிடைத்தது. நானும் ரௌடி தான் படம் பார்த்தேன். குறைந்த பட்ஜெட் வித்தியாசமான கதை என எடுக்க நினைத்திருக்கிறார்கள்.

                   

 

            இடைவேளைக்குப்பின் அமெச்சூர் டிராமா. அது தொலையுது. வசனங்கள் சில இடங்களில் கொடுமை. எதார்த்தமான வசனங்கள் என்ற பேரில் நீங்கள் கொட்டும் குப்பையை தான் அதற்குபின் எதார்த்தமாகிறது என்பதை எப்போ உணர்வீர்கள் இயக்குனர்களே? ஆணும் பெண்ணுமாய் குழுவாய் இருக்கும் போது ஆண்கள் இதுபோல பேசுவார்களா என்ன!! அதை மட்டும் கொஞ்சம் கவனித்திருக்கலாம். இதனால் மட்டும்  நயன்தாராவின் அத்தனை நடிப்பும், திறமையும் இந்த படத்துக்கு கொஞ்சம் ஓவர் என தோன்றச் செய்கிறது. பதிவு நயனை பற்றி நமக்கு எதுக்கு மத்த கதை. படம் முழுக்க பல இடங்களில் காதம்பரி என்பது நயன் ஏற்றிருக்கும் கதாப்பாத்திரம், மற்றபடி நயன்தாராவுக்கு செவித்திறன் குறைபாடு இல்லை என எனக்கு நானே நினைவூட்டிகொள்ள வேண்டியிருந்தது. ஆறாவது அறிவை மலுங்கடிகிறது அவரது நடிப்பு. பத்து வருடமா திரைத்துறையில் இருக்கிறார் என்கிறார்கள். உண்மைத்தான். இத்தனை வருடமாக இருந்திருக்கிறார், ஆனால் இப்போதான் நடிக்கத் தொடங்கியிருக்கிறார் நயன். இந்த படத்தில் நயன் சொந்த குரலில் பேசி இருக்கிறார். அதனாலோ என்னவோ அத்தனை உயிரோட்டமாக இருக்கிறது அவரது நடிப்பு. நயன் இம்முறை விஜய் சேதுபதியை ஓவர் டேக் செய்துவிட்டார் என்றே சொல்லலாம். 

            ஒரு முறை விழுந்துவிட்டால் அப்புறம் எப்படி எழுந்துகொள்ளவேண்டும் என்பதற்கு வாழும் எடுத்துக்காட்டு நயன். அவர் தனிப்பட்ட வாழ்க்கை பற்றி எனக்கு எந்த கருத்தும் இல்லை. அவர் நடிகையாக இருந்தாலும் மனுசி. அடுத்தவர் தனிப்பட்ட வாழ்கையை எப்போதுமே நான் விமர்சிப்பதில்லை. ஆனால் ஒரு பெரிய வலியை பெற்று மீண்ட ஒரு நபர் தன்னை நிலைநிறுத்த என்ன செய்யவேண்டும் என்பதற்கு, அல்லது குறைந்த பட்ச நம்பிக்கை பெறுவதற்கு நயன்தாராவின் திரை வாழ்க்கை ஒரு வழிகாட்டியாக இருக்கிறது. ஆம் அவர் முன்னிலும் தீவிரமாய் தன் பணியில் கவனம் செலுத்துகிறார். தன் திறமையை வளர்த்துக் கொண்டிருக்கிறார். முக்கியமாய் சில்க் சுமிதா போன்றோர் போல கோழைத்தனமாய் முடிவெடுக்காமல், போதை பழக்கத்துக்கு அடிமையாகாமல் தன்னை திசைதிருப்பிக்கொண்டு, மனதை மடைமாற்றிகொண்டிருக்கிறார். ஆனால் ஒரு குறை. 

       முன்பெல்லாம் லைலா கேரக்டர், பின் ஜெனிலியா கதாபாத்திரம் என லூஸு ஹீரோயின் காலகட்டமாக இருந்தது. இன்று துணிச்சலான பெண்கள் என காட்டுவதற்காக தொடர்ந்து ஒரு காட்சி படமாக்கப் படுகிறது. கவனித்தீர்களா? அது பொண்ணுங்க டாஸ்மாக்குக்கே போய் மதுபானம் வாங்குவது போன்ற காட்சிகள். பசங்க குடிச்சா தப்பில்லை என ஒரு பொன்னான கருத்தை பரப்பிய அதே சினிமா இப்போ அப்பாவுக்காக அல்லது காதலனுக்காக பீர் வாங்கும் பெண்கள் அன்பானவர்கள் என காட்ட முயல்கிறார்கள்(!?) அதற்கு நயன்தாரா கதாபாத்திரம் என முத்திரை குத்தப்பட்டுவிடும் போல. இதுவரை எனக்குத்தெரிந்து மூணு படத்தில் நயன் அப்பாவுக்காக பீர் வாங்கிவிட்டார். அதை அவர் தவிர்க்கலாம். மற்றபடி ராஜா ராணிக்கு பின் மெல்ல நடிக்கத்தொடங்கிய நயன் நானும் ரௌடி தான் படத்தின் மூலம் நானும் நெஜமாவே நடிகை தான் என நிரூபித்திருக்கிறார். அவர்க்கு ஒரு பொக்கே பார்சல்:)