சைன்ஸ் வாத்தியார் மோடியின் சாதனை!!

                         

            ஒரு  ஜூவி கொடுங்க என நான் கடையில் கேட்கும்போது அருகில் நிற்கும் பெண்களின் முகத்தில் அப்படி ஒரு அதிர்ச்சியை காணமுடிகிறது. நல்ல வாசிப்பு பழக்கம் உள்ள ஒரு தோழி என் கைப்பையை ஆராய்ந்து நான் படித்துக்கொண்டிருக்கும் புத்தகம் பற்றி அறியமுயல்கையில் ஒரு ரிப்போட்டரை பார்த்து "ஏ! என்ன இதெல்லாம் படிக்கிற? என ஏதோ படிக்ககூடாததை படித்ததைபோல் ரியாக்சன் காட்டிய அனுபவசூழலில் விசு அண்ணா என்னை தொடர்பதிவுக்கு அழைத்திருக்கிறார் அதுவும் அரசியல் பதிவுக்கு !!! நன்றி அண்ணா!

              மோடியின் நூறு நாள் சாதனையை கண்ணுக்கெட்டிய தூரம் வரை தேடியபடியே இருந்த நேரத்தில் எங்கள்  தலைமை ஆசிரியர் எங்களை  அழைத்து ஒரு டேட்டா கேட்டார். (மறுபடியும் ஒரு டேட்டாவா?) காமராசரின் மதிய உணவு, எம்.ஜி.ஆரின் சத்துணவு, கருணாநிதி மற்றும் ஜெயலலிதாவின் இலவச, விலையில்லா பொருட்கள் என கல்வித்துறை மாணவர்களுக்கு பல சலுகைகளை வழங்கி வருகிறதுஇல்லையா? அதில் மற்றுமொரு பயனுள்ள, இதுவரை என்.ஜி.ஓ க்கள் மட்டுமே கவனம் செலுத்திய ஒரு துறையை மோடி தேர்ந்தெடுத்திருக்கிறார். ஆம், அது சுகாதாரம். ஒவ்வொரு வகுப்பிலும் கழிவறை இல்லாத வீடுகள் கொண்ட  மாணவர்களின் பெயர் பட்டியல் கோரப்பட்டுள்ளது. அரசு அவர்களுக்கு மானியத்தில் கழிவறை கட்டிதரப்போவதாக தலைமையாசிரியர் மூலமாக தெரிந்துகொண்டேன். எதற்கும் கட்டிமுடித்தவுடன் இதை எழுதேன் என்று ஒரு ஞாயமான யோசனையை கஸ்தூரி முன்வைத்தபோதும், காதுக்கு கிடைத்த நற்செய்தியை பகிர்ந்துக்கொண்டு அண்ணன் இட்ட கடமையை நிறைவேற்றிவிட்டேன். அதென்ன சைன்ஸ் வாத்தியார்  மோடி என்றா கேட்கிறீர்கள். கோத்ரா ரயில் எரிப்பு சம்பவத்தில் நியூட்டனின் மூன்றாம் விதியை அவர் சுட்டிக்காட்டி பேட்டி அளித்ததாக நினைவு! எதிர்விளைவாய் பெஸ்ட் பேக்கரி வழக்கு நடந்தது இல்லையா? இந்தியரின்  பரம்பரை நோயான மறதி நோய்க்கு நான் மட்டும் விதிவிலக்கா என்ன?

பி.கு

அது ஆங்கில ஆசிரியர்கள் பதிவெழுதும் வலைப்பூ. என்னையும் எழுதச்சொன்னால் என்ன எழுதுவேன்? ஆம் ஒரு ஆங்கிலக்கவிதை தான். அதை படிக்க இங்க சொடுக்குங்க:)