புத்தம்புது மலரே என் ஆசை சொல்லவா?

                                       உன் ஆசை என்ன என ஒருபோதும் நம் பெற்றோர் கேட்பதில்லை. அவர்கள் நம் ஆசைகளை தெரிந்தே வைத்திருப்பார்கள். நம் வாழ்கைத்துணையும் கேட்பதில்லை. அவர்கள் நமக்குத் தெரியாமல், அதை கண்டுபிடித்து நமக்கு வியப்பை தர விரும்புவார்கள். ஆனால் நான் சிறுவயதில் படித்த கதைகளில் தேவதைகள் திடீர் என தோன்றி அப்படி கேட்டதுண்டு. வளர்ந்த பின் தான் தெரிந்ததெனக்கு தோழிகள் தான் தேவதைகள் என்று. இதோ அப்படி ஒரு தேவதை என்னிடம் கேட்டிருக்கிறது "உங்க ஆசை என்ன மைதிலி டியர்?"

          கிரேஸ் எனும் தேவதையே! கடவுளை விட்டுவிடுங்கள், உங்க ஆசையை மட்டும் சொல்லுங்கள் என்று சொன்னதற்காக உங்களுக்கு ஒரு பூங்கொத்து :) இனி என் ஆசைகள்.

1. தன்னை தானே கட்டுபடுத்திக்கொள்ளும் தெளிவுடன் கூடிய சுதந்திரம் எங்கெங்கும் வேண்டும். தனி நபர் முதல் ஈழம் முதலான தேசம் வரை. ஏனெனில் அடிமைகளுக்கு சுவர்க்கம் கிடையாது. சுதந்திரம் தான் உயிர்மூச்சை விட அவசியமானது.

2.பணம் எனும் விஷ(ய)ம் இல்லாமல் போகவேண்டும். தானே சமத்துவம் பிறக்கும்.

3.சாதி, இனம் துவேசம் கற்பிக்கும் மனநோயாளிகளுக்கெல்லாம் மறுவாழ்வு மையங்கள் தோன்ற வேண்டும். (அவர்கள் அங்குமட்டும் இருக்கட்டும்).

4.பசி எனும் நோய்க்கு நிரந்தர தீர்வு வேண்டும்.

5.எல்லா நோய்க்கும் ஏழைகள் வாங்கும் படியான விலையில் மருந்து வேண்டும்.

6.இடர்கள் வேண்டும். அதுஎதிர்க்கும் ஆற்றலும்,தெளிவும் வேண்டும். இல்லாவிட்டால் வாழ்க்கை அலுத்துவிடுமே.

7.பணத்திற்காக அல்லாமல் புத்தியை மலர்த்துவதற்காக படிக்கும் நிலை வரவேண்டும்.

8.உலகின் எந்த மூலையிலும் தனி இரவில் ஒருத்தி தெருவிளக்கில் இருளையே கவிதையாய்  படிக்கவோ, குடிக்கவோ, வடிக்கவோ முடிகின்ற சூழல் வேண்டும்.

9.எல்லைகோடுகள் இல்லா நிலை வேண்டும்.

10.குறைந்த பட்சம் ஒன்றே ஒன்று உலகத்தார் அனைவருக்கும் வேண்டும். அது தன்னை போல மற்றவர்களை மதித்தல் (empathy).

இது எதுவுமே பொதுநலம் எல்லாம் இல்லை. காலையில் காபி குடிக்கையில் கையில் கிடக்கும் செய்தித்தாள் கண்ணீரில் நனையும் அல்லது ரத்த அழுத்தத்தை அதிகரிக்கும் என் நிலை மாறவேண்டும் எனும் சுயநலம் தான். ஆசைகள் நிறைவேற வழி இருக்கா நண்பர்களே!

டிஸ்கி
இது கில்லர்ஜி அண்ணா தொடங்கி வைத்த தொடர்பதிவு. நானும் பத்து பேரை அழைக்கிறேன். கடவுளிடம் அல்ல இந்த தோழியிடம் ஆசை சொல்ல. வேற ஒண்ணும் இல்ல. இவங்க எல்லாம் நான் எப்போ வேணா, எப்டி வேணா இவங்களை disturb பண்ணலாம்னு ஏற்கனவே பர்மிஷன் கொடுத்திருக்காங்க:)

நண்பர்கள்

மலர்த்தரு கஸ்தூரி ரெங்கன்

வளரும் கவிதை நிலவன் அண்ணா

அவர்கள் உண்மைகள் மதுரைதமிழன்

ரிலாக்ஸ் ப்ளீஸ் வருண்

மின்னல்வரிகள் பாலாண்ணா (இவர் சீனு, ஆவி எல்லாரையும் சேர்த்துடுவார்)

தில்லையகம் சகாஸ்

எதிலும் புதுமை ஸ்ரீமலையப்பன்

சினேகாஸ்ரீ

நம்ம blog ஸ்ரீராம்

தென்றல் சசி