உறைந்து மீள்கிறது அங்காடித்தெரு!

தாள்கள் தீர்ந்த பின்னும்
அட்டை தேய்த்தும் வாங்கியாயிற்று!
காது கிழிந்துவிடும் வாய்ப்போடு
கைவிரல்கள் அறுக்கத்தொடங்குகிறது
சில கனவுகளையும் புன்னகையும்
நிரப்பிய நெகிழிப்பைகள் !



நான்காவது மாடியில்
மறுமுறை அட்டைதேய்க்கையில்
சலனமற்றிருந்தும் ஈர்த்துவிடுகிறது
ஒவ்வொரு முறையும் தாத்தாவை
பார்க்கும்போது மட்டுமே நினைவுக்கு வரும்
அவரது நடுக்கம்!

அர்த்தமுள்ளதாக மாறியிருக்கிறது
அன்றைய அங்காடிப்பொழுது
தாத்தாவின் புன்னகையை
பற்றியபடி நடக்கிறேன் !
பத்தில் எட்டுபேர்
திரும்பிப்பார்க்க
எட்டில் ஆறுபேர்
புருவம் உயர்த்த
ஆறில் நான்கு பேர்
நகைமுரண் சிந்த

கடந்துவிடுகிற நொடிக்குள்
வருடிக்கடக்கும் ஒற்றை சிறுமியின்
விரல் பட்டு சிலிர்த்துக்கொள்கிறது
தாத்தாவின் ஊன்றுகோல்
ஒரு நொடி உறைந்து மீள்கிறது
அங்காடித்தெரு!!