இசையின் வாசனை.

           

       
 

                      பழுப்பேறிய ஒரு புகைப்படத்தை பார்ப்பது போல் இருக்கிறது இப்படி பின்னோக்குவது. கோணல் வகிடெடுத்து மெலிசாய் கண்மை தீட்டிய விழி மூடி, தேன்கிண்ணத்தை சொட்டுச்சொட்டாய் பருகிறபடி இருக்கும் அம்மாவின் முகத்தை தொட்டு விலகும் ஒளியை ரசித்த என் ஏழு வயதிற்குள்ளாக தான் துளிர்த்திருக்கவேண்டும் இசையின் மீதான காதல். அப்படி உருகி உருகி என் அம்மா இசை பருகிய அந்த கருவியை உங்களில் எத்தனை பேர் பார்திருபீர்களோ! அது ஒரு சைக்கிளில் பொருத்தக்கூடிய head லைட்டுடன் சேர்ந்த ரேடியோ! P.B.ஸ்ரீநிவாசும், ஜானகியும், சுசிலாவும் காற்றில் சுகந்தம் பரப்பிய இரவுகள் தொலைத்த விடுதி நாட்களை எட்டுவயதில் சபிக்க அந்த ஒரு காரணம் போதுமானதாக  இருந்தது. 

                      விடுதியில் இருந்து வீடு திரும்பிய நாளில் அப்பாவோடு காரில் பயணிக்கிறேன் என்பதை விட அதில் காஸெட் போட்டு S.P.B, மனோ, சித்ரா, ஜென்சி என கேட்டபடி பயணித்த அந்த நொடிகளில் இன்னும் கமழ்ந்த படி இருக்கிறது காரைக்குடியில் இருந்து மணவை திரும்பும் வழியில் திருமயம் கேட்டில் வாங்கி, கைகளுக்கு இடையே தேய்த்து,உதடு குவித்து ஊதி அப்பா எனக்கு ஊட்டிய வேர்கடலையின் மணம். அப்பா ரசனையில் அம்மாவிற்கு சற்றும் குறையாத இசைக்காதலர். அத்தைகளின் இசை விருப்பமோ இருவரை போலவே இரண்டு விதமாக இருந்தது. ஒரு அத்தை  இளையராஜாவின் சோககீதங்கள் மட்டுமே  கேட்பது என சத்தியம் செய்யாத குறையாய் கேட்க,  இன்னொரு அத்தையின் ரசனை இன்று வரை எனக்கு வியப்பாகவே இருக்கும். அவர் எப்போதும் ரேகா, ரேவதி, நதியா பாடல்களை மட்டும் விரும்பி கேட்பார். அப்படி கதாநாயகிகளை முன்னிறுத்தி பாடல் கேட்பது தான்  கற்பு நெறி என்றே கருதுவார். அத்தைகள் இருவரும் பாட்டுபுத்தகங்கள்  வைத்து  தனக்கு தெரிந்த ராகத்தில் எல்லாம் பாடி என்னிடம் கருத்து கேட்டபடி இருப்பார்கள். அந்த பாடல்களை இப்போது கேட்க நேர்கையில் நாசி உணர்கிறது அவர்கள் தாவணி வாசனை. ரேகாவை அத்தை என  அழைக்க என்னை பழக்கிய  சின்ன அத்தையின் கைபேசியில் தற்போது மாமாவின் அழைப்பு வந்தால் மட்டும் உருகுதே! மருகுதே!

                  எல்லா அம்மாக்களையும் போல கோடைவிடுமுறையின் சிலநாட்களை தன் அம்மா வீட்டிற்கு கிளம்பினால் ஏதேனும் இரண்டு புத்தகங்கள் மட்டும் எடுத்துச்செல்ல அனுமதி கிடைக்கும். எங்கள் ஊர் தெருக்களை போல் வெயிலில் குளித்து வியர்வை பூசிக்கொள்ளாமல், என் அம்மாவின் தாய் வீடு ஏதோ  ஊரடங்கு  உத்தரவு போட்டது போல் எப்போதும் அமைதியாக இருக்கும் ஒரு செட்டிநாட்டுப் பகுதி. அதிக பட்சம் இரண்டு நாட்களுக்கு மேல் மாமாவின் பாட்டரி போட்ட டு -இன்-ஒன் தான் ஒரே நண்பன் அல்லது தோழி! ஜெயச்சந்திரன், வாணி ஜெயராம் பாடிய இந்த பாடலை விரும்பி கேட்டவர்கள் என்ற நீண்ட பட்டியலுக்கு பின் பின்மதியங்களை மீட்டியதெல்லாம் கோடை பண்பலையும், திருச்சி வானொலி நிலையமும் தான். 

            காசெட் நாட்களில் நாங்கள் தொலைகாட்சியின் பிடியில் இருந்தோம். வெள்ளிக்கிழமை ஒளியும் ஒலியும் மோகம் தீர்வதற்குள் பெப்சி உமா பேசிப்பேசி பாடல் ஒளிபரப்பத் தொடங்கி இருந்தார். பத்தாம், பன்னிரண்டாம் வகுப்புகளில் பாடல் கேட்க நேரமே இல்லாமல் நகர்ந்து கொண்டிருக்க ஹரிணி, உன்னிக்கிருஷ்ணன், ஹரிஸ் ராகவேந்திரா, உன்னிமேனன், நித்யஸ்ரீ என சிலர் கவனம் கலைக்கவே செய்தனர். பன்னிரண்டாம் வகுப்பு விடுமுறைக்கு பின் ஒரு நாள் வீட்டையே இருளில் ஆழ்த்தி அப்பா நீடு துயில் கொள்ள, அம்மாவின் விழிகள் ஒளியிழந்து போயின.

        இரண்டுவருடங்கள் இப்படியே கழிய, ஆசிரியர் பயிற்சி முடித்த கையோடு வீட்டில் பொழுதை நெட்டித்தள்ள முடியாமல் B.A முடிக்கும்வரை பக்கத்தில் இருக்கும் பள்ளிக்கு தற்கால பணியிடத்தில் வேலைக்கு சேர்ந்து முதல் மாத ஊதியத்தை அம்மாவிடம் கொடுத்தபோது ஒரு முடிவுக்கு வந்திருந்தேன். அடுத்த மாத ஊதியத்தின் ஒரு பகுதில் ஒரு C.D பிளேயர் உடன் இணைந்த F.M ரேடியோ மற்றும் சில ஹரிஹரன் பாடல் சி.டி களோடு தான் வீட்டுக்கு வந்தேன். அதன் பின்னான இரவுகளில் என் தங்கையின் படிப்புகாக இரவு ஒன்பது மணிவரை அமைதி காக்கும் வானொலி பதினோரு மணிவரை "இரவின் மடியில்" கிடத்தி எங்களை தாலாட்டி உறங்கவைக்கும். அம்மா கொஞ்சம் கொஞ்சமாக சகஜமாக, நான் திருமணம் முடித்து இரண்டு ஆண்டுகளில் அம்மாவும் அப்பாவை தேடிச்சென்ற சில நாட்களுக்குபின்னர்  என் அப்பத்தா அந்த சி.டி.ப்ளேயரை பார்க்கும் போதெல்லாம் கண்ணீர் மல்க தன் மருமகளை நினைத்துக்கொள்வார். என்ன ஒற்றுமை மாமியாருக்கும், அந்த மருமகளுக்கும் நான் பேச நினைப்பத்தெல்லாம் நீ பேசவேண்டும் தான் பிடித்த பாடல்.

      இதோ, இன்னும் என் இசை  நாட்கள் நகர்ந்த படியே இருக்கின்றன. ஸ்ரீநிவாஸ், ஜி.வீ  சைந்தவி, மதுஸ்ரீ, ஷக்திஸ்ரீ, என பலரும் பூங்கொத்துகள் நல்கி நகர்த்தும் என் பொழுதுகளில் P.B.Sக்கும், ஹரிஹரனுக்கும், ஜென்சிக்கும் ஒதுக்கப்பட்ட இடத்தில் அவர்கள் மட்டுமே கோலோச்சி கொண்டே இருக்கிறார்கள்.

இசை பற்றிய என் கவிதை
(இதுக்கும் மேல தொடர்ந்து படிக்க முடிஞ்சா இதையும் பாருங்க.